03.03.2014

Миронов Александр Степанович “Алмаасэргиэнбаан” АКБ ААУо Бырабылыанньатын Бэрэссэдээтэлэ

Александр Миронов

1970 сыл алтынньы 24 күнүгэр Дьокуускай к. төрөөбүтэ.

Александр Степанович саха омукка биллэр-көстөр общественнай-политическай лиидэрдэр төрөөн-үөскээн тахсыбыт, ону кытта саха төрүт култууратын, тылын-өhүн уонна уус-уран айымньытын биhиктэринэн буолбут икки бэлиэ улуустан — Yөhээ Бүлүүттэн уонна Тааттаттан хаан тардар.

Кини 1978 сыллаахха Yөhээ Бүлүүтээҕи Исидор Барахов аатынан 1 №-дээх оскуолаҕа үөрэнэ киирбитэ, оттон орто оскуоланы Таатта оройуонугар бүтэрбитэ. 1988 сыллаахха оскуоланы үрүҥ көмүс мэтээлинэн бүтэрбит. Александр Миронов В.В. Куйбышев аатынан Новосибирскайдааҕы тутуу-инженернэй институкка “промышленнай уонна гражданскай тутуу” диэн идэҕэ үөрэнэ киирбитэ. Кини идэтин таларыгар төрөппүттэрин сабыдыаллара улахан оруолламмыта. Ол курдук, ийэтэ, Yөhээ Бүлүү улууhун Ороhу нэhилиэгиттэн төрүттээх Августина Александровна архитектор идэлээх этэ. Аҕата Таатта Чөркөөҕүттэн сылдьар Степан Спиридонович эмиэ тутааччы, онон Александр Степанович оҕо сааhа тутуу түhүлгэтигэр ааспыта диэххэ сөп. Онон айар-тутар үлэ кини хааныгар баара уонна оннук күүрээн киниэхэ олоҕун суолдьута буолан ааста.

Институту Александр Миронов 1993 сыллаахха бүтэрэр. Ол кэмҥэ дойду олоҕор-дьаhаҕар улахан уларыйыылар-тэлэрийиилэр бараллар, онон аныгы кэм ирдэбилинэн кини 1999 сыллаахха Хабаровскайдааҕы экэниэмикэ уонна быраап судаарыстыбаннай академиятыгар “үп-харчы уонна кирэдьиит” диэн иккис идэтин ылар.

Александр Степанович үлэтин 1993 сыллаахха “Сир” баан инвестицияларга отделын сүрүннүүр специалиhынан саҕалаабыта.

1998 сылтан кини салайар үлэтэ саҕаламмыта. Ол курдук, бастаан “Сахабилиибаан” бастакы вице-премьеринэн, онтон араас сылларга “Алмаасэргиэнбаан” бырабылыанньатын бэрэссэдээтэлин бастакы солбуйааччытынан, “Сахакредитбанк” салайааччытынан үлэлээбитэ.

2005 сылтан олоҕун тиhэх күнүгэр диэри “Алмаасэргиэнбаан” бырабылыанньатын бэрэссэдээтэлинэн үлэлээн кэлбитэ. Бу кэмҥэ баан бэйэтин эйгэтигэр бас-көс балаhыанньаны ылары ситистэ, өрөспүүбүлүкэ иhигэр уонна таhыгар — Санкт-Петербург, Москва, Хабаровскай куораттарга бэйэтин салааларын арыйталаата.

Александр Степанович Саха сиригэр уонна Уhук Илиҥҥэ баан эйгэтин биир биллэр-көстөр идэтийбит салайааччыта этэ.

2006 сыллаахха Yөhээ Бүлүүтээҕи-Горнайдааҕы быыбардыыр уокурукка быыбардааччылар баhыйар үгүс куоластарын ылан Ил Түмэн V ыҥырыылаах болдьоҕор икки улуус дьокутаатынан буолбута. Онтон ыла өрөспүүбүлүкэ парламеныгар бүддьүөккэ, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэт бэрэссэдээтэлин солбуйааччытынан, ону кытта тутуу уонна олох-дьаhах-коммунальнай хаhаайыстыба сис кэмитиэтигэр олус көхтөөхтүк үлэлээбитэ. Бу тыын суолталаах икки кэмитиэккэ үлэтэ быыбардааччыларын туруорсууларын олоххо киллэриигэ көдьүүстээх буолбута саарбахтаммат. Ону 2013 сыллааҕы быыбар хампаанньата ырылхайдык көрдөрөр: Александр Миронов утарсааччыларын ырааҕынан хаалларан Yөhээ Бүлүү уонна Горнай улуустарыттан Ил Түмэн норуодунай дьокутаатын аатын иккистээн ылар.

Александр Степанович бэйэтин дьиэ кэргэнигэр олус бэриниилээх этэ. Кэргэнигэр Лена Гаврильевнаҕа, уолаттарыгар Виталийга, Тимурга, Альбертка.

Александр Степанович дьон өйүгэр-санаатыгар, туох-ханнык иннинэ, чиэhинэй киhи, сатабыллаах салайааччы, бэриниилээх үлэhит, истиҥ доҕор уонна эппиэтинэстээх үлэhит быhыытынан хаалыа. Ханнык баҕарар үдүк дуоhунаhы кини үлэhит кэлэктиип, быыбардааччылар уонна дьон-сэргэ иннилэригэр сүҥкэн эппиэтинэс быhыытынан ылынара. Төрөөбүт төрүт дойдутун ис сүрэҕиттэн таптыыра, Саха Өрөспүүбүлүкэтин дьиҥнээх патриота этэ. Ону олоххо хас биирдии хардыытынан, үлэтинэн-хамнаhынан, өрөспүүбүлүкэ уйгутун, экэниэмикэтин ханнык баҕарар таhымҥа көдьүүстээхтик туруулаhан дакаастыыра. Маннык үлэни-хамнаhы кини ханнык баҕарар киhи сиэрин уонна ытык иэhин быhыытынан ылынара.

2006 сыллаахха Александр Миронов “Лучший банкир России 2006 года” диэн үрдүк ааты ылбыта.

Саха Өрөспүүбүлүкэтин Бэрэсидьиэнин Бочуотунай Грамотатынан, РФ Региональнай сайдыыга министиэристибэтин Бочуотунай Грамотатынан наҕыраадаламмыта. Оттон дьон кыhалҕатыттан хаhан да туора турбат майгыта “СӨ Бочуоттаах мецената” аатынан бэлиэтэммитэ.

2013 сыл сэтинньи 22 күнүгэр Саха Өрөспүүбүлүкэтин Бэрэсидьиэнин Ыйааҕынан, баан эйгэтин уонна өрөспүүбүлүкэ социальнай-экэнэмиичэскэй сайдыыларыгар уhулуччу үтүөлэрин иhин А.С. Мироновка “Саха Өрөспүүбүлүкэтин норуотун хаhаайыстыбатын үтүөлээх үлэhитэ” бочуоттаах аат иҥэриллибитэ.

Биографияттан кылгас түгэннэр

1970 сыл алтынньы 24 күнүгэр Дьокуускай к. төрөөбүтэ.

1993 с. Новосибирскайдааҕы тутуу-инженернэй институту, 1999 с. Хабаровскайдааҕы экэниэмикэ уонна быраап академиятын бүтэрбитэ.

Yлэтэ-хамнаhын түhүмэхтэрэ:

1993-1997 сс. — “Сир” аахсыйалаах баан инвестицияларга салаатын сүрүннүүр специалиhа, түргэн операциялар отделларын 1 категориялаах специалиhа, валютанан операциялар управлениеларын 2 категориялаах специалиhа, валютанан операциялар управлениеларын начаалынньыгын солбуйааччыта;

1997-1998 сс. — “Сахабилиибаан” бэрэсидьиэнин көмөлөhөөччүтэ, бастакы вице-бэрэсидьиэнэ;

1998-2002 сс. — “Алмаасэргиэнбаан” АБ ХЭУо бырабылыанньатын бэрэссэдээтэлин бастакы солбуйааччыта;

2002-2003 сс. — “Сахакредитбанк” АКБ бырабылыанньатын бэрэссэдээтэлэ;

2003-2004 сс. — “Алмаасэргиэнбаан” АКБ ААУо бырабылыанньатын бэрэссэдээтэлин бастакы солбуйааччыта;

2005 сылтан олоҕун тиhэх күнүгэр диэри — Алмаасэргиэнбаан” АКБ ААУо бырабылыанньатын бэрэссэдээтэлэ.

Саха Өрөспүүбүлүкэтин Ил Түмэнин норуодунай дьокутаата.

Кини кэннигэр кэргэнэ Лена Гаврильевна, үс уол оҕото хааллылар.

Нагыраадалара, аата-суола:

2006 с. — “Лучший банкир России 2006 г.” бириэмийэ; Саха Өрөспүүбүлүкэтин Бэрэсидьиэнин Бочуотунай Грамотата; РФ Регионнар сайдыыларыгар министиэристибэтин Бочуотунай Грамотата.

2013 сыл сэтинньи 22 күнүгэр Саха Өрөспүүбүлүкэтин Бэрэсидьиэнин Ыйааҕынан, Миронов А.С. “СӨ норуотун хаhаайыстыбатын үтүөлээх үлэhитэ” бочуоттаах аат иҥэриллибитэ.

Алесандр Миронов “СӨ Бочуоттаах мецената” этэ.



Фотографии Александра Степановича Миронова




Возврат к списку